FOTOGALERIJA » 2019-2020 m.m.

OŽGAVIENIU ŠPUOSĀ
OŽGAVIENIU ŠPUOSĀ

Vėina cėntra cėguonā nuosės sukėšėn pri kompa siediejė ėr i struovas vėsuokės veiziejė. Skanē būtom ožjiestė, bet nagāl prigāutė tūm skaniēstu. Taj sumėslėjė, ka šindėin ī kap tik gera dėina – už žėimuos išvarīma gāl oždarbies gāutė! Plīkteliejė vėsė nu soulāliu i spāudė strajītėis - mergēlkas plaukus sosibrāukė, morzelės pasigražėna, jopelės išeigėnės ožsīsegė, kuoskēlės ožsirėša. No, naatsilėka nu anūm ni bernā – bōrnuosus išeigėnius nu gėmbės pasigruobė, ūsus sūtepė su kiāulės taukās, ka muotriškuom patėktu. Žuodžiu, sosiblėzgėna čīstā. Tik kōr pōltė tuos oždarbies ėiškuotė? No i sumėslėjė par cėntra kveteras pārētė, pazbitkavuotė bėški. Bet na bikuo tanuor tėj cėguonā - doud dounas – sotropėn, doud mėltu – ėšdolkėn, o vat doud piningū ė sāldāiniu – je, tīnk tumet, sāka „gausi dongou šėlta vėita už ton“. Vot tata, žmuogelē i kruovė i tērba tus sāldāinius, ka tik tōn dōngu prigāutu, net anūm truopniuoji mergēlka nabipānešė tuos terbuos, pārlēda bērnou. Tas taj vīrs dėkts – šast unt kupruos i sāka, ka dār gāl kriāutė... Bet ka jāu vėsas kvetēras apšmiriniētas, iš kor baišpēši... No bet i atidėrba tėj cėguonā už skaniēstus – vėsus vėdurius išvērtėn kriuōkė ,,Žėima, žėima, biek iš kėima!!!“, ėr rėitus kėlnuojė, ėr jopelės doskėna, ėr ūsus rāitė, ėr krāipies vėsēp. Aj, vo vėina ciuocė somėslėjė, ka rēk žėima atgāl parsikvėistė... No bet nieks anuos nasiklāusė, net cėntra pats glāuniāsis generuols lėipė anon varītė. Most ana tōn cėguonu terbēlė bova nusispėtrėjusi, nuoriējė nugvaltavuotė... Bet anėj dėkta liaudis īr, atsilāikė. No vot tatā, most ėr išvārė ton žėima, katruos dorā ni namātė...Vo jūs a variēt? Tikōus, ka pasilīnksminuot truopnē, nes nu rītuojāus linksmībės bėngās... Vo jūm čia vogōlnē vėskon sugōldė tuokė ciuocė Kristina. I dā pīlma gālėt paveiziet ė patėkrīnt, ar ana namalāva :)